TAMKO RASMI ASK OPTSAM — UZINDUZI WA JUKWAA LA ELIMU YA AFYA YA MACHO

TAMKO RASMI

ASK OPTSAM — UZINDUZI WA JUKWAA LA ELIMU YA AFYA YA MACHO

Tarehe: 22 Oktoba 2026

Mwanzilishi: J.M. Samwel (Optometrist)

Tanzania

Kutoka katika maono hadi katika utekelezaji: Optsam kuelekea Dira ya Taifa ya Maendeleo 2050

Tangu nilipotangaza rasmi kuingia katika utumishi wa umma mwaka huu, nimeendelea kutafakari namna ninavyoweza kuunga mkono jitihada za kuboresha afya ya jamii, huku nikiendeleza maono yangu binafsi ya muda mrefu katika elimu na uhamasishaji wa afya ya macho.

Nina heshima kuwa sehemu ya safari ya kitaaluma inayoniwezesha kutumikia jamii kupitia mfumo wa afya wa umma. Kwangu, hatua hii haimaanishi kuachana na maono ya Optsam, bali ni nafasi ya kuyatafakari upya na kuyaendeleza kwa namna inayozingatia maadili ya taaluma, uwajibikaji na maslahi ya wananchi.

Siku kadhaa zilizopita, kabla ya tukio la leo, nilishiriki kupitia ukurasa wangu wa Instagram mtazamo wangu kuhusu Dira ya Taifa ya Maendeleo 2050 na nafasi ya elimu ya afya ya macho katika kufikia malengo mapana ya maendeleo ya taifa.

Miongoni mwa mikakati niliyokuwa nimejiwekea kwa mwaka huu ni kuanzisha jukwaa lisilo la kibiashara ambalo lingewezesha wananchi kupata elimu, taarifa sahihi na mwongozo wa jumla kuhusu afya ya macho bila kujali mahali walipo.

Leo, Oktoba 22, 2026, ninatangaza rasmi uzinduzi wa Ask Optsam — Tovuti na Programu Tumizi (Application), hatua mpya katika safari ya maono niliyoyaanza mwaka 2017.

Uzinduzi huu unafanyika katika kipindi ambacho Tanzania inaendelea na jitihada za kupanua upatikanaji wa huduma za afya kupitia utekelezaji wa Bima ya Afya kwa Wote. Ninaamini kuwa upatikanaji wa huduma za afya unaendana na umuhimu wa wananchi kuwa na elimu sahihi, kuelewa masuala ya afya zao na kujua wakati unaofaa kutafuta huduma za kitaalamu.

Ask Optsam inalenga nini?

Ask Optsam ni jukwaa la elimu na uhamasishaji wa afya ya macho linalolenga kuwafikia wananchi kupitia teknolojia ya kidijitali, kwa kutumia Kiswahili na Kiingereza.

Kupitia tovuti na application yake, maono yetu ni kupanua upatikanaji wa taarifa za afya ya macho, kuelimisha kuhusu kinga ya upofu unaozuilika, kuongeza uelewa kuhusu uoni hafifu na kuhimiza wananchi kutafuta huduma stahiki za kitaalamu wanapohitaji.

Jukwaa hili halilengi kufanya biashara ya miwani wala kuchukua nafasi ya uchunguzi, utambuzi na matibabu yanayotolewa na wataalamu wa afya. Lengo lake ni elimu, uhamasishaji na kusaidia wananchi kufanya maamuzi yenye taarifa sahihi kuhusu afya ya macho.

Optsam na utumishi wa umma

Ninapenda kuweka wazi kuwa Ask Optsam ni mpango binafsi wa elimu ya afya ya macho na si programu rasmi ya Serikali, wala haiwakilishi taasisi ninayofanyia kazi.

Nitaendelea kuheshimu taratibu za utumishi wa umma, maadili ya taaluma yangu na mipaka inayohitajika kati ya majukumu yangu ya kikazi na shughuli za jukwaa hili. Ask Optsam inalenga kuunga mkono elimu ya afya kwa jamii bila kuingilia majukumu ya Serikali au kutumia nafasi yangu ya kazi kwa manufaa ya kibiashara.

Maono kuelekea Dira ya Taifa ya 2050

Ninaamini kuwa maendeleo ya taifa yanajengwa pia kwa wananchi wenye maarifa, wanaoweza kupata taarifa sahihi na wanaoshiriki katika kulinda afya zao.

Kwa mtazamo huo, ninaiona Ask Optsam kama mchango wangu binafsi katika kupanua elimu ya afya ya macho kwa njia ya kidijitali, nikitumaini kwamba hatua hii itakuwa mwanzo wa kuwafikia wananchi wengi zaidi Tanzania na, baadaye, katika Afrika Mashariki.

Optsam haikuwa jina tu. Imekuwa maono, safari na dhamira ya kuelimisha jamii.

Leo, maono hayo yanaingia katika hatua mpya.

Naitangaza rasmi Ask Optsam Website na Ask Optsam Application. Karibuni katika jukwaa letu la elimu ya afya ya macho.

J.M. Samwel

Mwanzilishi wa Ask Optsam

Optometrist | Tanzania

Elimu ya afya ya macho kwa kila mtu, popote alipo.